Kalawanging Kuwerdas

Naglalakad ako pabalik ng opisina galing sa isang meeting nang maisip kong tumutok sa pagsusulat tungkol sa musika dito sa blog na ito, na “nangalawang” na nga sa kawalan ng laman. Pinagpipilitan ko pang maging political blogger, pero otomatiko naman akong nagtitimpi (o kaya nama’y nababagot) sapakgat nasa larangan na ng pulitika ang trabaho ko ngayon. At kung tutuusin, di naman natupad iyon, panay “Balitang Kapi” ang tags ko dito.

Marapatin ko na lang talagang magsulat tungkol sa musika, ang “pers lab” ko talaga ika nga ng Hotdog. Na tinataghiyawat na ako’t natutunaw parang ice cream sa ilalim ng araw… este parang ice cream na nagpupuyat kapag dinaratnan ng “hummm-hummm-hummm” sa kama at kakailanganin ko tuloy na gunin ang gitarang nangangalawang ang kuwerdas sa gilid ng kama. Na talagang malalim ang hinanakit kong may kaugnay sa musika (hindi sa musika, kundi sa mga bagay na naglalayo sa akin dito…

pag-usapan natin sa susunod na entry siguro).

Na isa naman talagang kabalintunaan, na makikita sa listahan nitong “what to expect (o what I plan to do)” sa blog na ito:

1. Hindi ninyo ako aasahang magsulat ukol sa kung ano ang hit ngayon sa radyo, o kung sino ang sikat (bagaman gustong-gusto ko ngayon ang Sinosikat), o kung ano ang uso (bagaman puwede akong mag-discuss tungkol sa mga trends siguro).

2. Hindi ninyo ako aasahang magbigay ng insider info, dahil hindi na nga ako naging insider sa eksena ng musika. Sige, may kilalang ganun o ganyan, pero hanggang ganun lang siguro. Well, sa ngayon lang, hopefully. 

3. Siguro pa-rebyu-rebyu ng ibang musikero, mga napuntahan kong eksena (na madalang-dalang), mga album (na ayon sa mga prediksyon ay maglalaho na sa planeta), at iba pang matipuan.

4. Siguro tungkol na rin sa personal na journey o pagtatangka na rin na, kahit papaano, may matupad sa mga planong napako na ng dalawang taon o mahigit pa.

5. Siguro ilang teorya sa musika, mga philosophising ek-ek, mga exposition sa “state of the music industry” na malamang ay baka misinformed or malinformed or otherwise hindi talaga maituturing bilang expert opinion.

Pero heto na naman ako’t naglalagay ng mga limitasyon at bakod. Samantala, ang musika ay namamayagpak, iniikutan ang mundo ng makailang beses, winiwika ang hindi masambit ng mga tao sa iba’t ibang sitwasyon lalo na’ng mga ipit at hindi makapagsalita, at iba pang pagsasalarawan na ang ibig sabihin lang ay musika ang lahat, pero hindi siya nawa.

So, “hanggang dito na lang, bukas muli,” tulad ng pangungundiman ng The Jerks.