May nasagap akong tsismis na boboto ang mayorya sa mga mahistrado para sa petisyon ng Sigaw ng Bayan at Ulap. Wala pa ang opisyal na desisyon, at sana nga hindi ganito ang kanilang pasya. Sana'y trial balloon lamang ang tsismis na ito.

Personal kong tindig noong nauna na mukhang maganda nga yata ang panukalang pagpapalit ng sistema ng gobyerno tungo sa parlyamentaryo-pederal mula sa diumanong makalumang presidensyal-unitaryo. Maiibsan sana ng panukalang ito ang halalan nating madumi na'y magastos pa, at higit na mahalaga, ang imperyalismo ng Maynila.

Ngunit ang mga naglipanang panukala–sa loob at labas ng kamara–ay hindi talaga maganda.

Sa panahong kasalukuyan kung saan ang mandato ng ating liderato ay kuwestiyonable, hindi ko yata masisikmurang ang mga kuwestiyonableng pinunong ito na manatili sa puwesto hanggang 2010 at magpasawalang-hanggan, tulad ng implikasyon ng mga ipinapanukala.  Sa panahon ngayong wala nang tiwala ang taumbayan sa mga nahalal na pinuno, mahirap yatang tanggalin sa kanila ang kapangyarihang iboto ang pinuno ng bansa at hayaan ito sa mga kadalasa'y ulupong na mananatili sa puwesto.

Ang kawalan ng tiwala sa mga pinuno natin ang siyang nananaig na sentimyento pagkatapos sumambulat ang kasalukuyang krisis-pulitikal, na nagsimula nang matuklasan ang mga pag-uusap ng Mahal na Pangulo at ng isang opisyal ng Comelec sa telepono. Hindi natin alam kung nagpapasalamat ang mamamayan sa intelihensiyang militar para sa rebelasyong ito, sapagkat pati sa militar ay nawala na rin ang tiwala ng tao.

Pagkagunaw ng ating mga institusyon ang magaganap kung matutuloy ang chacha.

Una, totoong may pressure sa Korte Suprema upang wasto ang maging pasya nito sa kaso ng People's Initiative, at galing ito sa taumbayan. Ngayon–rasyonal man o hindi ang sentimyentong ito–palagay ko'y magugunaw ang tiwala ng taumbayan sa mga respetable nating mahistrado kapag pabor sa pagpapatuloy ng krisis-pulitikal ang kanilang pasya, lalo na't alam nilang karamihan sa mga kasalukuyang mahistrado ay appointee ng Malacañang.

Magugunaw rin ang sistema ng halalan. Una, malalaktawan ang susunod na halalan kapag natuloy ang chacha, at dahil dito, hindi magagamit ng taumbayan ang kanilang kapangyarihan sa pagkakataong ito, alang-alang sa mga transitory provision. Ngayon, kung hindi pa matupad ang mga mahahalagang repormang pang-eleksyon–kasama na ang pagtanggal ng mga ulupong sa Comelec at paglalagay ng maayos at malinis na sistema sa pagboto, elektroniko man o hindi–ay talagang nalintikan na ang konstitusyonal nating karapatang piliin ang mga mamumuno sa atin.

Higit sa lahat, magugunaw ang tiwala ng taumbayan sa sistemang pang-batas ng bansa, sapagkat alam nilang sinagad ng mga proponent ng chacha ang mga batas upang matupad ito.

Ngayon, sana nga'y trial balloon lamang ang tsismis na aking nasagap. Ibig sabihin nito, may pagkakataon tayong umalma at magbigay ng pressure sa Korte Suprema upang maging independiyente ang kanilang pagpapasya. Ipaalam nating nananagutan ang Korte Suprema sa konstitusyon at sa mga batas na ang taumbayan mismo ang naghulma.