Noong nakaraang linggo lang, kaharap niya ang mga lokal at dayuhang negosyante nang sabihing hindi niya susuportahan ang anumang panukalang batas na magpapababa ng "competitiveness" ng bansa.

Malabo man ang kanyang binitiwang salita, maaaninag na tinutukoy niya ang Senate Bill 2411 ni Senador Ralph G. Recto, na tinututulan ng mga negosyante dahil sa panukala nitong putulin na ang pagbibigay ng Income Tax Holiday at iba pang mga insentibong tinatamasa na ng mga negosyante sa ilalim ng mga kasalukuyang batas, partikular na ang mga batas na gumawa sa Board of Investments at Philippine Economic Zone Authority.

Ngayon naman, nagsalita si Kal. Gabby Claudio na prayoridad pa rin ang panukalang rationalization ng mga insentibo sa buwis, gayong aminado siyang marami pang prayoridad na malamang sa hindi ay unahin ng Kongreso. Ano ba talaga ang gusto ng Mahal na Pangulo?

May dahilan naman ang kontrobersiyal na panukalang batas ni Senador Recto: ito'y upang tapalan na ang malaking tagas sa kaban ng bayan dulot ng hindi wastong pagbibigay ng mga insentibo (o ang pagbibigay ng mga ito sa mga negosyong itatayo rin naman kahit wala ang mga insentibong ito). Ang problema nga lang, dahil sa pagtanggal ng mga malalaking insentibo, higit na lumalala ang imahe ng gobyerno na mahilig magpalit-palit ng mga patakaran sa gitna ng boksing.

Oo, hindi naman insentibo ang tangi o pinakamahalagang dahilan kung bakit itinatayo ang mga negosyo sa bansa. Oo, kailangang higit na gawing progresibo ang pagbubuwis (i.e. higit na malaki dapat ang buwis ng mayayaman kaysa mahihirap).

Ngunit kailangang siguruhin hindi basta-basta magsisi-alisan ang mga negosyo at mawalan ng trabaho ang mga tao. Masusing pagbabalanse ang kailangang gawin ni Madam at ng Kongreso. Mataimtim na pagmamasid din ang kailangang gawin ng mga tao sa isyung ito.