Ngunit ang higit na wastong tanong: gantimpala nga ba ito o kalasag?

Nitong mga nakaraang araw lang, umugong ang balitang ilalagay si Palparan sa National Security Council (NSC) bilang katuwang ni National Security Adviser Norberto Gonzales, <i>deputy adviser for the anti-insurgency campaign,</i> ika nga ni Presidential Chief-of-Staff Mike Defensor. At alam na natin ang kuwento: kinontra ang pahayag na ito ni Executive Sec. Eduardo Ermita, na siya rin namang binawi ni G. Defensor.

Sa loob ng isang buwan–pagkatapos ng mahaba-habang bakasyon–pa natin malalaman kung saan ilalagay ng Mahal na Pangulo si Palparan. Saan nga ba siya ilalagay? Ang alam lang natin, gusto ni Palparan sa puwesto kung saan magiging sangkot pa rin siya sa paglaban sa mga komunista sa Pilipinas. Ngayon pa lamang ay umaalma na ang mga nasa legal na kaliwa laban sa pagkakaluklok ni Palparan sa National Security Council.

Ngunit ilalagay nga ba siya–isang mainit na tinapay–ng administrasyon sa gitna ng hurno?

Gusto nga ba talaga niya doon? May banta laban sa kanyang buhay ang Partido Komunista ng Pilipinas-Bagong Hukbong Bayan. Tiyak, hindi siya tatantanan ng Kongreso (parehong ang Senado at ang minorya ng Mababang Kapulungan) at tatawagin siya sa kung anu-anong mga pagdinig. Markado na rin ang kanyang ngalan sa iba't ibang internasyunal na organisasyon, tulad ng Amnesty International at maging ng United Nations Human Rights Council.

Bagaman madami ngang tututol sa panukalang bagong trabaho ni Palparan, malaki ang pagkakataong itulak ito ng Mahal na Pangulo. Una, ito ang posisyong gusto ng heneral, at ang magigiting at matatapat na heneral ng Hukbong Sandatahan ay binibinyayaan ng Pangulo pagkatapos mag-retiro. Pakatandaang malaki ang utang na loob ni GMA sa militar sa pagkakaluklok niya sa puwesto noong 2001.

Ikalawa, kaka-ahon lamang sa hurno ng impeachment ang Mahal na Pangulo, isang tagumpay na nagbigay sa kanya at sa mga alipores niya sa Malacañang ng lakas ng loob para sumubok ng mga medyo sagad na kilos (tulad na lamang ng CPR, EO464, PP1017, at kamakailan lamang, MC108). Malakas din ang loob niyang sagarin ang lahat ng kilos para sa hinahangad na Charter Change (saka na lamang ang detalye nito sa susunod). Kumpara dito, maliit at pang-asar lamang sa oposisyon ang pag-takda kay Palparan sa NSC.

Ikatlo, tulad na nga ng nasabi ng mga komentarista, kailangang bigyan si Palparan ng proteksyon, sapagkat marami ngang mga bantang humaharap sa magiting na heneral. Sapagkat hindi siya duwag, tulad ni Joc-Joc Bolante, na nag-asam ng asylum sa Estados Unidos dahil sa banta ng Neps. Sapagkat mainit-init at greaseless pa siya sa kamay ng mga mambabatas, tiyak na sangkatutak na imbestigasyon na naman, na siya ang bida. At pihado, dadaan siya sa Commission on Appoitnments, kung saan din ay hindi siya tatantanan.

Gayumpaman, tingin ko pa ri'y hindi ngayon susugal ang Mahal na Pangulo. Mayroon pang mga heneral na higit pang mahalaga sa Pangulo dahil sa mga botong hatid nila at kailangang biyayaan (wala sa "da tapes" ang pangalan ni Palparan, sa pagkakaalam ko). Bukod doon, ipatatawag at ipatatawag pa rin ng Kongreso ang heneral, at baka mangyari sa kanya ang nangyari kay Bert Gonzales (baka mapa-subo siya ng saging nang di oras).

Ipupusta kong sa Presidential Commission on Good Government (PCGG) siya ilalagay. Una sa lahat, good boy si Palparan.

Ikalawa, ang kasulatang naglikha sa PCGG–ang Executive Order No. 1–ay may probisyong pumipigil sa anumang administratibo, lehislatibo o hudisyal na proseso na ipatawag ang sinumang kasapi ng komisyon. Ligtas na ligtas siya dito mula hindi lamang sa Kongreso kundi pati na rin sa Komisyon sa Karapatang Pantao, sa Kagawaran ng Katarungan at maging sa sariling mga imbestigasyon ng Malakanyang.

Ikatlo (hindi ko lamang ito sigurado, wastuhin na lamang ninyo ako kung sakali mang nagkamali), hindi kinakailangang dumaan sa Commission on Appointments ang mga kasapi ng PCGG.